Silaannakkut angallanneq
Mittarfiit heliportillu attaveqarnermi pingaaruteqartut ilagaat, Kalaallit Nunaannit Kalaallillu Nunaannut ilaasunik angallassineq tamarmi silaannakkut ingerlammat.
Narsarsuarmi Kangerlussuarmilu mittarfiit Kalaallit Nunaannut iserfiit pingaarnersaraat. Mittarfiit heliportillu helikopterillu uninngavii aamma ilaasunik angallassinernik nassiussanillu assartuinermik sullissisuupput.
2006-miit pisortat ilaasunik angallassinermut tapiissutaat silaannakkut angallassinermuinnaq atorneqarput. Pisortat tapiissutaat nunap immikkoortuini siunertanut sammitinneqarput, taakku kiffartuussinermut isumaqatigiissutit tunngavigalugit timmisartunik angallavigineqartarput.
Timmisartukkut ilaasunik angallassinerit amerlanersaat silaannakkullu nassiussanik assartuinerit annertunersaa aningaasarsiornermik tunngaveqarpoq, tassa imaappoq pisortanit tapiiffigineqarneq ajorput. Aningaasarsiornermik tunngaveqarluni angallassinerit ilisarnaatigaat ilaasut amerlaneruneri mittarfiillu timmisartunut sululinnoortuuneri.
Mittarfiit ingerlanneqarnerat Mittarfeqarfiit isumagisaraat, taakku Namminersorlutik Oqartussanit pigineqarput.
Heliportit amerlanersaasa helikopterillu uninngaviisa ingerlanneqarnerat Air Greenland A/S-mit Pilersuisoq A/S-millu isumagineqarput.